Ég elska

að prjóna úr þessu garni sem heitir Fame trend og er frá Marks & kattens. Litirnir eru alveg ótrúlega flottir og hvernig þeir tvinnast saman.

Ég ákvað að prjóna mér sokka úr hnotu sem ég keypti mér einhvern tíman í vetur. Þar sem ég er svo hrifin af því að byrja á tánni ákvað ég að nota þá tækni.

Þar sem mér finnst líka svo gaman að finna upp hlutina sjálf ákvað ég að hanna mér sokka sem byrja á tánni. Eftir að hafa byrjað að minnsta kosti þrisvar sinnum (of vítt, of breið tá, of þröng tá) var ég með þetta á prjónunum og fótunum.

Mér fannst þetta líta alveg ljómandi vel út og var meira að segja með svo mikla hönnun á sokkunum að ég setti gataprjón sem munstur í þá.

Eftir því sem sokkurinn stækkar er ég ánægðari. Víddin er alveg eins og ég vil hafa hana, litirnir flottir svo ekki get ég kvartað.

Svona líta þeir út núna. Hællinn er ótrúlega auðveldur. Hefðbundi hællinn er auðveldur ef maður kann hann en ef ég væri að byrja að prjóna sokka mundi ég vilja læra þennan hæl því hann er mörgu sinnum auðveldar en sá hefbundni.

Þar sem mér er lífsins ómöglegt að vera bara með eitt stykki í gangi í einu ákvað ég að byrja á litríkri stelpupeysu. Sjáum hvað verður úr henni og hver fær.

Þar sem myndirnar af fína vestinu sem ég hannaði og prjónaði voru svo glataðar ákvað ég að setja inn nýjar myndir af því.

Neðst var breiður klukkuprjónsbekkur. Mér fannst skemmtilegt að breyta frá því að hafa stroff.

Svona lítur það út að aftan og

svona lítur það út að framan. Garnið er silkimjúk blanda af merino ull og silki. Getur varla stungið nokkurn mann. Einnig var það drjúgt því ég notaði bara þrjár hespur í vestið.

Svo er ég alltaf að lesa. Ég ákvað samt að hætta að setja inn allar bækurnar sem ég les en ætla að setja inn bækur sem eru það góðar að ég verð að láta vita að ég hafi lesið þær. Ég er samt bara að ná að lesa tvær bækur í júni en náði að lesa fjórar bækur í maí (reyndar hraðlas ég tvær þeirra).

Í gær hélt ég upp á afmælið mitt og gleymdi náttúrulega að taka myndir. Ég bauð upp á tvenns konar súpur og var önnur Mexico súpa með nacho og öllu tilheyrandi, hin var kölluð Argentínusúpa þar sem Argentína var hitt liðið sem var að keppa í fótbolta þetta kvöld. Hún var reyndar rjómalöguð sveppasúpa með hráskinku út í. Ferlega góð og uppskriftin er á ms.is. Síðan var boðið upp á kökur á eftir. Mér fannst mjög skemmtilegt að fá næstum alla til mín, vantaði hluta af noregsliðinu og karlmennina í Mosarima. Þetta er eitt af því sem mér finnst gefa lífinu gildi, að hitta fólkið sitt og eiga góðar stundir með því.

Fullt búið

af prjónadóti. Nú er orðið svo langt síðan ég setti eitthvað inn að ég er búin að klára nokkur stykki síðan. Fyrst má nefna norska peysu sem ég gerði á HB. Hún valdi munstur og liti sjálf.

Mér finnst peysan ferlega falleg og vel valin hjá henni. Svo var líka mjög gaman að prjóna hana enda var ég ekki nema rúman mánuð með hana.

Ég bjó til nokkrar prjónanælur. Þegar maður er orðin svona mikil prjónakona er ekki lengur hægt að nota garn til að merkja fyrir útaukningum eða öðru. Guðný sem er með mér í handavinnusaumaklúbbi kenndi mér að búa til svona nælur. Það er verst hvað myndin er léleg en myndavélin yfirlýsir svo mikið að litirnir sjást ekki almennilega. Svo var ég að reyna að dekkja myndina í tölvunni og það fór ekkert sérstaklega vel.

Karen er búin að fá húfu við peysuna sína. Kötturinn er sá forvitnasti sem ég veit um og má ekki missa af neinu. Hann stakk sér inn í mynd um leið og ég smellti af.

Þetta er klassískt húfusnið og ég er að hugsa um að setja það inn á vefinn. Það sem mér finnst svo gott við það er að það lokar vel á eyrun. Svo er bara að stilla lykkjufjöldann af þannig að munstrið passi við. Ég notaði sama munstur og er neðst á peysunni sem húfan er við og það kom bara vel út.

Þetta er ekki búið. Eitt stykki klassískt sjal er líka tilbúið. Maður verður að hafa eitthvað að prjóna við sjónvarpið og hvað er betra en sjal?

Ég bara spyr?

Jú, það er líka ferlega fínt að prjóna lopapeysu fyrir framan sjónvarpið. Kanski ekki akkúrat munsturbekkinn en allt þetta einlita er fínt að prjóna fyrir framan TV svo það verði ekki leiðinlegt.

Gunni fékk þessa fínu peysu svo nú er hann kominn í eina sem er ekki trosnuð framan á ermunum, neðan á kanntinum og í hálsmálinu.

En þetta er ekki búið því ég gerði líka vesti sem ég hannaði alveg sjálf, gerði prufu og reiknaði út.
Það var náttúrulega líka gaman. Garnið er ótrúlega flott enda blanda af merinoull og silki. Svo er það sjálfmunstandi svo ég þurfti bara að prjóna án þess að hugsa.

Þá er upptalið það sem ég er búin að vera að gera undanfarið. En ......

það er ekki hægt að vera aðgerðarlaus svo ég byrjaði í gær á sokkum sem ég byrja á tánni. Ég er að prófa að gera þá án þess að nota munstur. Það verður spennandi að sjá hvernig fer...

Það sem er í gangi

er eins og venjulega allt of mikið. Það er svo erfitt að takmarka sig þegar svona margar freistingar eru í gangi.
Ég ákvað að setja inn mynd af garninu sem ég var að lita um daginn. Nú er ég búin að vinda það upp í hnykla og, án gríns, er það ekki minna girnilegt heldur en garn í garnbúð.

Í einum saumaklúbbnum mínum var sett í gang verkefni sem fólst í því að það átti að prjóna úr einni plötu af lopa og einni dokku af skrautgarni. Hér er mynd af því sem ég er að gera en ég ætla ekki að segja strax hvað þetta er. Kanski er það augljóst og ég ferlega hallærisleg að halda að það sjáist ekki. Verst hvað myndavélin er leiðiðnleg með að yfirlýsa myndir hjá mér. Garnsamsetningin sést ekki nógu vel hvað þá að liturinn njóti sín.

Í öðrum saumaklúbbi sem ég er í fór í gang umræða prjónamerki sem Guðný hafði búið til. Þau voru ferlega flott hjá henni og mér skilst að sambærileg merki séu seld dýrum dómi þar sem þau fást. Guðný sendi okkur hópnum lista yfir það sem þurfti til að búa til merkin og svo á að búa til merki í næsta saumaklúbbi. Ég get verið frekar óþolinmóð þegar eitthvað skemmtilegt er í boði svo ég bara keypti það sem mig vantaði og bjó til 4 prjónamerki. Stelpur, ef þið lesið þetta, þá á ég fullt af perlum svo það þarf ekki að kaupa þær.

Hér sjást litirnir aðeins betur.

Eins og venjulega er stafsetning og orðalag á ábyrgð Sólveigar systur.

Ótrúlega

flott síða sem Ólöf systir benti mér á. Þessi kona er algjör snillingur með nálina og ég varð dáldið montin því sys sagði að verkin hennar minntu hana á Blá útsaumsverkið mitt.

Slóðin er rebeccasower.typepad.com

Þetta er síða fyrir þá sem hafa áhuga á að sauma frjálst og föndra ótrúlega fallega hluti. Sólveig, þú gætir haft gaman af þessu eins og ég og Ólöf.

Síðan hennar er að vissu leiti ljóðræn og það er gaman að fletta í gegn um hana og skoða.

Matarlitir

eru skemmtilegir og hægt að nota þá í annað en bara mat. Nýjasta nýtt hjá mér er að lita garn með matarlitum. Ég var í saumaklúbbi með skemmtilegum vinkonum og Hildur sagði okkur frá þessari snilld að nota matarliti í garnlitun.

Daginn eftir klúbb tíndi ég til slatta af óspennandi garni.


Allt gamalt sem ég hef ekkert gert með. Hvíta garnið var ekki eins hvítt og það lítur út fyrir að vera á myndinni.
Næst var farið í búðina og keyptur grænn og rauður matarlitur ásamt ediksýru.
Svo var byrjað. Ég ákvað að byrja með græna litinn því ég er svo veik fyrir öllu sem er grænt.

Þetta mallaði í pottinum í dáldin tíma og lá síðan þar til enginn litur var eftir í vatninu.

Og vola, svo fínt, grænt garn. Garnið er mislitt því ég setti það mishratt ofan í vatnið til að fá áferðina.

Nokkrum dögum seinna var sett í rauða litun. Þá litaði ég svakalega appelsínugult garn sem ég gat ekki notað í neitt. Útkoman var þessi heiti, rauði litur sem tónar út í appelsínugult.

Nú er bara að láta sér detta eitthvað í hug að búa til úr garninu.

Þetta er svo spennandi að ég hugsa að það endi með því að ég verði búin að lita fullt af gömlu garni og afgöngum. Nú er bara að fara og fá sér fleiri liti.

Ég þarf líka að finna mér liti sem lita bómull. Það skal tekið fram að matarlitirnir virka á ull og ullarblöndu en bómullarband sem ég batt hespurnar með tók ekki snefil af lit.

Ullarhúfa fyrir herra

Erma- og sokkaprjónar nr. 3,5

Garn: Alpaca frá Sandnes (keypt í garnbúðinni Gauju í Mjódd og fæst einnig í Rúmfatalagernum), 1 dokka dökkgrár nr. 1088 og 1 dokka ljósgrár nr. 1042

Fitjið upp 120 lykkjur með ljósgráu á prjóna nr. 3,5. Prjónið stroff, 1 slétt lykkja, 1 brugðin lykkja. Prjónið þar til allt stroffið mælist 11 cm. Skiptið þá yfir í dökkgráan. Prjónið slétt.

Í fyrstu umferð á að auka út um 1 lykkju á 15 lykkja fresti 7 sinnum. Þá eru 127 lykkjur á prjóninum.

(ATH. Þeir sem vilja ekki fá húfuna belglaga sleppa þessari útaukningu og þá að sama skapi er sleppt þegar lykkjurnar eru felldar af.)

Prjónið þar til allt mælist 23 cm. Fellið þá af 7 lykkjur. (Þessari affellingu er sleppt ef ekki var aukið út um lykkjurnar) Prjónið áfram þar til allt mælist 25 cm. Þá er tekið úr fyrir kolli.

- Prjónið 5 lykkjur, prjónið 2 lykkjur saman. Úrtakan er endurtekin allan hringin. 103 lykkjur á prjóni.

- Prjónið 4 umferðir.

- Prjónið 4 lykkjur, prjónið 2 lykkjur saman. Úrtakan er endurtekin allan hringinn. 86 lykkjur á prjóni.

- Prjónið 3 umferðir.

- Prjónið 3 lykkjur, prjónið 2 lykkjur saman. Úrtakan er endurtekin allan hringinn. 69 lykkjur á prjóni.

- Prjónið 2 umferðir.

- Prjónið 2 lykkjur, prjónið 2 lykkjur saman. Úrtakan er endurtekin allan hringinn. 52 lykkjur á prjóni.

- Prjónið 2 umferðir.

- Prjónið 1 lykkju, prjónið 2 lykkjur saman. Úrtakan er endurtekin allan hringinn. 35 lykkjur á prjóni.

- Prjónið 2 umferðir.

- Prjónið 2 lykkjur saman allan hringinn.

Klippið á bandið og þræðið það í gegn um allar lykkjurnar sem eru eftir. Gangið frá öllum endum.

Ef einhver notar uppskriftina og verður var við villur í henni, látið mig endilega vita því ég er ekki búin að prjóna aðra húfu eftir að ég skáði uppskriftina á blað.

Skemmtileg síða

Ég rakst á þessa síðu þegar ég var að skoða prjónauppskriftir og blogg. Ég ákvað að setja slóðina inn því þessi kona er greinilega virkur prjónari og tók meira að segja þátt í prjónaólympíuleikunum. Kíkið á ef þið hafið áhuga.

Knitting Patterns Knitspot - Anne Hanson Knitting Pattern Designer Blog and Knitting Patterns Shop

Öðruvísi lopapeysa

Stærð: M

Garn: Plötulopi (2 plötur), skrautgarn 1 fyrir prjóna nr. 2,5 – 3 (4 - 5 dokkur), skrautgarn 2 með móhair fyrir prjóna nr. 5 (3 dokkur).

Prjónar nr. 5

8 tölur

Prjónfesta: 10 x 10 cm eru 17 lykkjur og 24 umferðir á þveginni prufu.

Bolur:
Bolurinn er prjónaður í einu stykki, fram og til baka. (Ef hann er prjónaður heill þarf að bæta við 2 – 4 lykkjum til að klippa stykkið í sundur.)

Fitjið upp 148 lykkjur með skrautgarni 2 á prjóna nr. 5.

Prjónið stroff á eftirfarandi hátt: *Ein umferð slétt, tvær umferðir 1 lykkja slétt og 1 lykkja brugðin*. Prjónið þessa 3 prjóna þar til allt stykkið mælist 5 cm.

Eftir það er prjónað slétt prjón með einföldum plötulopa og skrautgarni 1. Prjónið þar til allt stykkið mælist 24 cm.

Nú er tekið úr fyrir mitti: Fellið af 4 lykkjur jafn dreift yfir stykkið þ.e. 1 lykkja á fyrra framstykki, 2 lykkjur á bakstykki og 1 lykkja á seinna framstykki. Prjónið 3 umferðir. Fellið aftur af 4 lykkjur jafn dreift yfir stykkið. Núna eru 140 lykkjur á prjóninum.

Prjónið nú þar til allt stykkið mælist 31 cm. Þá er aukið um 4 lykkjur jafnt dreift yfir stykkið. Nú eru 144 lykkjur á prjóninum.

Prjónið nú þar til allt stykkið mælist 41 cm. Þá eru prjónaðar 31 lykkja, 8 lykkjur eru settar á band og geymdar, prjónið 66 lykkjur, 8 lykkjur eru settar á band og geymdar, prjónið 31 lykkju.

Nú er þetta stykki geymt.

Ermar:
Fitjið upp 41lykkju með skrautgarni 2 á prjóna nr. 5. Tengið í hring og prjónið stroff eins og á bol þar til ermin mælist 5 cm. Skiptið þá yfir í lopa og skrautgarn 1 og prjónið slétt prjón þar til allt mælist 14 cm. Aukið þá út um 2 lykkjur undir ermi á 10 cm fresti þar til 54 lykkjur eru komnar á prjóninn. Prjónið þar til ermin mælist 50 cm. Setjið þá 8 lykkjur af undirerminni á hjálparprjón eða band og geymið ermina.

Prjónið hina ermina eins.

Berustykki:
Tengið saman bol og ermar á eftirfarandi hátt: Prjónið 31 lykkju af bol, prjónið ermi við, prjónið bakstykkið, prjónið ermi við, prjónið 31 lykkju. Nú er búið að tengja saman þá hluti sem mynda berustykkið.
Prjónið þá á eftirfarandi hátt:
Prjónið 14 umferðir. Prjónið þá saman 7. og 8. lykkjurnar allan hringinn.
Prjónið 4 umferðir. Prjónið saman 6. og 7. lykkjurnar allan hringinn.
Pjónið 6 umferðir. Prjónið þá saman 5. og 6. lykkjurnar allan hringinn.
Prjónið 6 umferðir. Prjónið þá saman 4. og 5. lykkjurnar allan hringinn.
Prjónið 6 umferðir. Prjónið þá saman 3. og 4. lykkjurnar allan hringinn.
Prjónið 4 umferðir. Í næstu umferð eru felldar af 7 lykkjur jafn dreift yfir umferðina.

Nú eru alls 80 lykkjur á prjóninum. Klippið garnið frá og skiptið yfir í skrautgarn 2
Prjónið hálsmál.

Hálsmál:
Prjónið með skrautgarni 2 yfir lykkjurnar 80 eins stroff og er á bolnum. Prjónið 6 cm. Fellið af.

Vinstri kantur:
Prjónið upp 114 lykkjur með lopa og skrautgarni 1 á prjóna nr. 5 meðfram allri hliðinni, hálsmál meðtalið. Prjónið stroff eins og á bol. Prjónið 6 umferðir. Prjónið síðan 1 umferð með skrautgarni og fellið af.

Hægri kantur:
Er prjónaður eins og vinstri kantur nema að í þriðju umferð er fellt af fyrir hnappagötum þannig: Prjónið 9 lykkjur, slá bandinu yfir prjóninn og prjónið 2 lykkjur saman. *Prjónið 12 lykkjur, sláið þá bandinu yfir prjóninn og prjónið 2 lykkjur saman*. Endurtakið frá * til * þar til 8 hnappagöt hafa myndast.

Frágangur:
Lykkið saman undir höndunum, gangið frá endum og saumið tölur á peysuna.

Teppið

Ég gleymdi að setja inn mynd af teppinu hennar mömmu eins og það lítur út (allar myndirnar saman). Gullfallegt og hangir upp á vegg hjá HB.

Bútasaumur

Ég ákvað að setja inn myndir af bútasaumsteppi sem mamma mín gaf heimasætunni í afmælisgjöf. Þetta er með fallegri teppum sem ég hef séð og hún er núna búin að búa til eitt teppi handa öllum þremur heimasætum fjölskyldunnar.

Það sést ekki nógu vel á myndunum að hún er búin að sauma út í þær til að gera þær flottari.

Fyrst er það skautastelpan því HB er að æfa skauta.

Svo er það blómastelpa og mér finnst það skemmtileg tilviljun (eða ekki) því á tímabili vildi HB láta kalla sig "Blóma" því það var svo flott nafn. (Hún var líklega um 4 - 5 ára þá)

Svo er það hauststelpan

og að lokum sumarstelpan.

Gó mamma, halda svona áfram því þetta er svo flott hjá þér.