Jólagjafapakki 2

Þá er það næsti skammtur af jólagjöfum.
Ég gaf frænda mínu í Noregi útprjónað húfu og vettlingasett. Fannst tilvalið að hann ætti eitt norskt sett. Ég ákvað samt að hafa það ekta stráka og prjónaði hauskúpumynstur á það.
Svona litu vettlingarnir út

og aðeins nær

Hauskúpurnar voru ekkert mjög frýnilegar. Mér fannst hönnunin samt ótrúlega flott og hauskúpan koma vel út.

Það var líka ferlega gaman að prjóna þetta munstur enda ég ekki vön að prjóna hauskúpur og því um líkt. Þegar ég prjóna norskt munstur prjóna ég oftast áttblaðarósina eða eittvað í þeim dúr.
Svo var það húfan. Sama munstur en sett í húfu. Húfan kom líka mjög flott út. Bestu meðmælin voru þau að frændur mínir 2 sem fengu svona húfur voru farnir að nota þær. Það eru meðmæli með munstrinu.

Uppskriftina að þessu setti fékk ég á Ravelry síðunni. Hún er brunnur af uppskriftum, sérstaklega fylgihlutum.

Ég á eftir að setja inn mynd af húfunni sem Dfrændi fékk en ég hafði hana aðeins öðruvísi að neðan svo strákarnir gætu þekkt húfurnar sínar í sundur. Þfrændi fékk líka vettlinga og voru þeir brúnir og hvítir svo bræðurnir gætu þekkt þá í sundur. Ég gleymdi að taka mynd af þeim í flýtinum fyrir jól svo Ssys ef þú lest þetta þá máttu endilega taka mynd af vettlingunum og senda mér. Ekki væri heldur verra að fá mynd af strákunum í jólafjöfunum.

Jólagjöf 1

Ein jólagjöfin sem ég bjó til í ár var vélsaumuð. Ég ákvað að sauma kjól handa Katrínu litlu frænku minni.


Málið er að ég saumaði brúðarkjól á Sólveigu systur fyrir nokkrum árum síðan. Efnið kláraðist ekki alveg heldur átti ég eftir sirka metersbút af því ásamt ræmum sem sniðust af þegar kjóllinn var sniðinn. Ég vissi aldrei hvað ég átti að gera við efnið og geymdi það með það í huga að það hlyti að koma að því að eitthvað yrði hægt að gera úr því.

Nú í desember fékk ég þá brilliant hugmynd að sauma kjól á dóttur systur minnar úr brúðarkjólaefninu. Efnið er þykkt og vandað satínsilki og bætti ég við bleikum skrautborða til að það yrði léttara yfir kjólnum.

Kjóllinn er mjög sparilegur svo nú er bara að vona að hann sé ekki of hvítur og fínn fyrir þá litlu að vera í honum. Sólveig, þú verður endilega að láta hana í hann og það verður að hafa það þó það komi blettir í hann. Vonandi er bara hægt að þv0 þá úr.

Kjóllinn er gerður fyrir 5 ára svo hún fer ekki að nota hann alveg strax enda bara 3 og 1/2. Þegar sú stutta passar í kjólinn verða ermarnar ca á miðjum framhandlegg. Það þýðir að hún getur byrjað að nota hann fyrr.

Ég held að ég þurfi eiginlega að verða mér út um mynd af Ssys í brúðarkjólnum til að sýna hann.

Jólin koma

og verða komin áður en ég veit af. Þar sem öll handavinnan sem ég geri núna eru jólagjafir ákvað ég að sýna jólaskraut sem ég hef búið til.
Fyrir nokkrum árum bjó ég þessa engla til. Þeir eru alltaf jafn hátíðlegir og fallegir í einfaldleika sínum.
Jólasokkinn saumaði ég handa syninum. Það er ótrúlega gaman að sauma Bucilla hlutina og um leið svo einfalt. Þegar ég er að prjóna eða sauma eitthvað erfitt er gott að hafa annað einfalt með. (Hjá mér er það svona 2 - 3 erfið stykki og 4 - 5 létt stykki í gangi í einu).

Sokkurinn er einfaldur og fallegur og fær að hanga í stofunni þar sem ég neita syninum um að hafa hann í herberinu meðan það lítur út eins og útibú frá heimsins mesta sóða (ég reyni alla vega að trúa þvi að hann sé ekki mesti sóðinn).

Ég þarf að sýna mynd af mesta stoltinu mínu í jólaskrauti. Það var sko vinna í því. Kemur næst.

Bókin

Sokkar og fleira eftir Krístínu Harðardóttir er ansi góð að mínu mati. Bókin er 72 blaðsíður og er hún ríkulega myndskreytt.

Fremst í bókinni er gott efnisyfirlit þannig að auðvelt er að finna það sem leitað er að.

Kristín skiptir bókinni upp í nokkra kafla eftir því hvernig sokkauppskriftir hún setur fram. Í upphafi hvers kafla er stutt umföllun sem er nokkuð skemmtilegt að lesa.

Það er tvennt annað sem mér finnst gera þessa bók eins góða og hún er. Það fyrra er að hún er með allt frá mjög einfaldum uppskriftir fyrir byrjendur yfir í að vera með uppskriftir fyrir prjónabrjálæðinga eins og mig sem vill ekkert of einfalt í prjónaskap. Hitt sem ég er svo hrifin af er að hún er með uppskriftir af nokkrum hælum. Ég kann að prjóna tvær gerðir af hæl, nú get ég hlakkað til að prjóna nýjar hælatýpur.

Ég held að enginn verði svikinn af því að kaupa sér bókina. Mér finnst þetta skemmtilegasta prjónabókin á markaðinum í dag. Hún gefur líka prjónurum sem eru lengra komnir verkefni til að vinna að. Mér finnst vera galli á flestum prjónabókunum sem eru gefnar út hér á landi að þær eru svo allt of einfaldar og því langar mig ekki til að kaupa þær. Það verður að vera eitthvað "challenge" í þeim.

Hringur

Mér datt í hug um daginn að hekla mér hring. Ég hef séð svo marga fallega heklaða hringi að ég varð að prufa. Ég notað frekar "villt" garn. Ég er hrifin af útkomunni. Ég er að hugsa um að kalla hann Villiblómavönd því einn mætur maður lýsit honum þannig að það væri eins og ég væri með villiblómavönd á fingrinum.

Það var mun auðveldara að gera hringinn en ég átti von á. Það var í rauninni mun erfiðar að ráða við garnið og finna lykkjurnar heldur en að hekla formið.

Ég er voða ánægð með hann og nota hann reglulega. Hann er frekar stór svo ég var að hugsa umað gera mér annan minni úr "rólegra" garni. (púff, ekki horfa á hendurnar, ég sé að ég þarf að fara að gera eitthvað við þær svo ég verði aðeins dömulegri)

Svona lítur hann út. Ég heklaði líka bandið utan um fingurinn í stað þess að setja hann á málmhring eins og ég hef séð gert við mörg blómin. Mér fannst þetta ágæt lausn sérstaklega þar sem átti engan hring að sauma blómið á og langaði að klára hann strax. Ekki mikil þolinmæði þegar verið er að hanna eitthvað fínerí og andinn kemur yfir mig.

Jólagjafirnar eru í fullri framleiðslu. Vonandi klárast þær allar fyrir jól og þá koma myndir.

Eitthvað flott

Ahhh, að eiga góða prjónatösku fulla af einhverju skemmtilegu er nauðsynlegt. Ég á tvær. Og fulla hillu, og nokkra poka, og fulla kistu og .... úff nú er ég að ganga fram af sjálfri mér. Ég held að áramótaheitið í ár ætti að vera að vinna úr birgðunum til að reyna að grynnka á þeim.

Freistingarnar eru bara svo margar. Ég segi alltaf ef einhver er hissa á öllu garninu sem ég á að það var eins gott að ég féll fyrir garni en ekki einhverju öðru eins og víni. Ég veit ekki hvar ég væri stödd þá. En ég held að ég sé eins og alki í vínbúð þegar ég fer í garnbúð, mig langar í allt og á ótrúlega eftitt með að velja og ekki að ræða það að labba út með ekkert í poka.

Þetta garn keypti ég í garnbúðinni í Hveragerði. Það er ótrúlega mjúkt og gott viðkomu og samt 100% ull. Unnur, sem er með mér í Prjónapínum, er búin að prjóna sjal úr sínu garni og það er svo mjúkt viðkomu að meira að segja ég gæti verið með það um hálsinn og ekkert á milli. Ég þarf að fara að prjóna eitthvað úr því. Þegar jólagjafirnar klárast....... vonandi fyrir miðnætti á Þorláksmessu........ og engir tveir eins vettlingar á vinstri........ og enginn á hægri!!!!

Norsk peysa

Það er svo gaman að prjóna norskar peysur, sérstaklega ef mynstrið er krefjandi. Fyrir ekki svo löngu fór ég inn á Sandnes vefinn en þar er framleitt allt smart og alpakka og fleira garn sem ég prjóna dáldið mikið úr. Þar sá ég þetta blað



Það virkaði ekki hjá mér að snúa myndinni svo þið verðið bara að halla höfðinu. En í blaðinu var þessi uppskrift


Ég féll algjörlega fyrir henni. Litatónarnir eru nýjir, að minnsta kosti man ég ekki eftir því að hafa séð margar norskar peysur með fjólubláum tóni í.
Ég fór á stúfana og leitaði í öllum Rúmfatalagers búðunum að blaðinu en það var ekki til þar. Ég var að spá í hvort það væri ekki flutt inn til landsins.
Svo vel vildi til að mamma og pabbi fóru til Noregs í haust og mamma fékk það verkefni að kaupa blaðið fyrir mig. Hún fann það í garnbúð í Sandnes en það sem okkur fannst nokkuð spes var að til að fá að kaupa blaðið varð hún að kaupa eitthvað garn í búðinni. Ég græddi því 4 dokkur af Smart.
Ég er byrjuð á peysunni og komin svona langt

Munstirð er gullfallegt og mjög gaman að prjóna það. Garnið er bara yndislegt en ég prjóna hana úr Sandnes Alpakka.

Ég er líka byrjuð á ermunum því það er ekki hægt að prjóna þetta munstur við sjónvarpið, það er allt of flókið til þess. Svo er bara að hætta að blogga og fara að prjóna......

Hafmeyjan

Ég er búin að lesa Hafmeyjuna eftir Camillu Låckberg. Hún var æði. Ég gat ekki lagt hana frá mér eftir að ég var komin vel af stað með hana. Og endirinn, ég varð að kaupa mér næstu bók til að sjá hvernig fór. Þessi kona er alveg frábær rithöfundur. Ég get eindregið mælt með þessar bók fyrir þá sem eru hrifnir af spennusögum sem eru líka fjölskyldusaga.

Húfa - Karen

Stærð: 6 – 8 ára

Garn: Smart frá Sandnes, 1 dokka aðalllitur og ein dokka af þeim litum sem eru notaðir í munstur. Gott er að nota einn af munsturlitunum í kanntin neðan á húfunni.

Prjónar: Ermaprjónar og sokkaprjónar nr. 3,5

Prjónfesta: Eins og gefin er upp fyrir garnið.

Athugið að ég gef ekki upp munstrið í húfunni þar sem ég fékk það lánað annars staðar frá. Auðvelt er að nota hvaða munstur sem er, bara þarf að gæta þess að það passi við lykkjufjöldann.

Byrjað er á að prjóna eyrun.
Eyra:
Fitjið upp 5 lykkjur og prjónið slétt prjón.
Prjónið 1 umferð.
Nú hefst útaukning.
Prjónið 2 lykkjur, aukið um 1 lykkju, prjónið 1 lykkju, aukið um 1 lykkju, prjónið 2 lykkjur.
Nú eru 7 lykkju á prjóninum
Prjónið 1 umferð slétt til baka.
Þessar 2 umferðir eru prjónaðar þar til 23 lykkjur eru á prjóninum.
Gætið þess að alltaf er aukið út eftir fyrstu 2 lykkjurnar og fyrir síðustu 2 lykkjurnar.
Prjónið áfram þar til allt mælist 6 cm. Geymið.
Prjónið annað eyrnastykki alveg eins.

Húfa:
Prjónið eyra, fitjið upp 18 lykkjur (bak), prjónið hitt eyrað, fitjið upp 44 lykkjur (fram). Tengið saman í hring.
Þá eru 108 lykkjur á prjóninum.
Prjónið 3 umferðir.
Aukið í næstu umferð út um 1 lykkju fyrir ofan hvort eyra, 110 lykkjur eru á prjóninum.
Prjónið þar til allt mælist 15 cm.

Nú hefst úrtaka fyrir kollinn:
Úrtaka: Prjónið 9 lykkjur, prjónið 2 lykkjur saman. Þetta er endurtekið allan hringinn og þá eru 100 lykkjur á prjóninum.
Prjónið 2 umferðir án úrtöku.
Úrtaka: Prjónið 8 lykkjur, prjónið 2 lykkjur saman. Þetta er endurtekið allan hringinn. Prjónið 2 umferðir án úrtöku.
Úrtaka: Prjónið 7 lykkjur, prjónið 2 lykkjur saman. Þetta er endurtekið allan hringinn. Prjónið 1 umferðir án úrtöku.
Þessi úrtaka er prjónuð áfram þar sem alltaf er einni lykkju minna á milli úrtakanna.
Prjónið svona þar til 10 lykkjur eru eftir á prjóninum.
Prjónið þá 6 umferðir án úrtöku.
Klippið þá bandið og dragið í gegn um lykkjurnar.

Kanntur:
Byrjið við miðju að aftan. Takið upp 1 lykkju í hverja prjónaða lykku framan og aftan á. Á eyrunum er teknar upp 2 lykkjur í hverjar 3 en passa þarf að við oddinn þarf að taka upp ca 3 lykkjur svo eyrað herpist ekki saman neðst.
Prjónið 4 garða.
Fellið laust af. Gott er að nota prjóna nr. 5 til að fella af með, þá eru minni líkur á að kannturinn herpist saman.

Frágangur: Gangið frá ölllum endum.

Appelsínukragi

Þessi kragi er ferlega hlýr og þægilegur. Hjá mér var mikilvægt að velja garn sem styngi ekki og þess vegna prjónaði ég hann úr merinóull. Vegna úrtökunnar sem er í kraganum hangir hann ekki niður heldur helst þokkalega vel uppi.

Litlir hringprjónar nr. 3,5

1 hnota/dokka af garni sem passar fyrir prjónana

Munstur:
* Prjónið 8 lykkjur, slá bandi yfir prjóninn, prjónið 2 lykkjur saman*. Endurtekið frá * til * út hringinn. Prjónið 1 umferð slétt prjón. (Þegar kemur að úrtöku fækkar lykkjunum 8 fyrst í 7 lykkjur og síðan í 6 lykkjur.)

Kragi:
Fitjið upp 120 lykkjur og prjónið 3 garða. Tengið í hring. Prjónið munstur allan hringinn. Þá eiga að vera 12 munstur.

Prjónið 5 cm.

Pjónið þá * 7 lykkjur , slá bandi yfir prjóninn, prjónið 2 lykkjur saman*. Endurtekið frá * til * út hringinn. Þá eru 108 lykkjur á prjóninum.

Prjónið þar til stykkið mælist 10 cm.

Pjónið þá * 6 lykkjur , slá bandi yfir prjóninn, prjónið 2 lykkjur saman*. Endurtekið frá * til * út hringinn. Þá eru 96 lykkjur á prjóninum.

Prjónið þar til allt mælist 15 cm.

Prjónið 4 garða.

Fellið laust af. Gott er að nota prjón nr. 5 til að fella af með. Þá fæst úrtaka sem er nógu laus til að komast auðveldlega yfir höfuð.

Svo sætur

Hvað er friðsælla en að sjá kött sofa? Ég varð næstum öfundsjúk út í að hægt væri að sofa svona vel. Kötturinn haggaðist ekki þó ég tæki nokkrar myndir af honum.

Hann lét ekki einu sinni rifa í augun. Bara steinsvaf. Hann er ekki alltaf svona rólegur. Núna truflar draslið í stólnum hann og er hann farinn að bregða á það ráð að taka hnyklana og teppið í kjaftinn og draga fram á gólf. Það er ótrúlega fyndið að sjá hann böglast með þetta og þess vegna set ég garnið aftur upp í stólinn til að geta hlegið meira.

Rauðu hanskarnir

eru búnir fyrir nokkru síðan. Það tók sinn tíma að skola úr þeim og leggja þá til og að því loknu að taka mynd af þeim.
Útkoman er þessi


Þeir eru fagurrauðir með gylltum þræði í, prjónaðir úr sisu garni. Garnið er fallegt þannig að útkoman verður fín.

HB á þá og bara ánægð með þá. Ég hélt fyrst að þeir gætu orðið of jólalegir en það er ekki. Um leið og það fer að kólna getur hún notað þá.

Ég get nú ekki sagt að hanskar sé það skemmtilegasta sem ég prjóna. Ónei, þeir eru seinlegir og mér fannst ég alltaf vera að gera það sama þegar ég prjónaði fingur eftir fingur. (Ótrúlegt tillitsleysi við prjónafólk að maðurinn skuli vera með 10 fingur). En þar sem útkoman var góð á ég kanski eftir að nenna að prjóna annað hanskapar. Ég lofa samt engu....

Þegar kóngur kom

er alveg ótrúlega skemmtileg bók. Ég kláraði hana fyrir stuttu síðan og hafði verulega gaman af því að lesa hana. Er enn að hugsa um hvort hún sé sannsöguleg eða ekki svo vel er hún skrifuð.
Meðan ég var að lesa hana fórum við Gunni á Árbæjarsafn. (Hann var búin að lesa bókina) Megnið af tímanum þar fór í að skoða húsin og athuga hvenær þau voru byggð. Ef þau voru frá þeim tima sem sagan gerist fórum við inn og skoðuðum húsið. Ég held að það hafi sjaldan verið jafn gaman að heimsækja safnið. Ekki skaðaði að þar var einnig markaður og keypti ég þá bestu chillisultu sem ég hef smakkað (líklegast sú eina sem ég hef smakkað ;-)Ég væri alveg til í að prófa að búa til svona sultu svo ef einhver á uppskrift sem ég má fá eða getur bent mér á síðu með góðri uppskrift þá væri það vel þegið.
Annars er ég búin að búa til rifsberjahlaup og sólberjahlaup með Ólöfu systur. Rifberjahlaupið er mjög gott en ég enn að bíða eftir að sólberjahlaupið verði þykkt svo hægt sé að borða það. Með þessu er ég alveg að verða fyrirmyndarhúsmóðir eða er það ekki?

Ný handavinnubúð

Ég fór í nýju handavinnubúðina "Amma mús prjónahús" í dag. Það var bara skemmtilegt. Þarna voru nokkrar nýjar garntegundir t.d. Rauma garnið sem ég hef vitað lengi af en ekki fengist hér. Mjög flott garn. Einnig er danskt garn sem heitir Duo til þar. Ótrúlega flott. Ég keypti mér Duo sem er blanda af ull og silki. Einnig Duo sem er hrein ull. Einnig keypti ég mér uppskrift til að prjóna eftir úr garninu og fannst mér hún heldur dýr.
Duo garnið er drjúgt eða 540 m í 100 gr. Litirnir eru þannig að mig langaði í fullt af garni. Lét samt nægja að kaupa tvo liti, rautt og grænt.

Ég er að lesa ótrúlega góða bók sem heitir The cathedral by the sea (Kirkja hafsins). Ég er á fleygiferð hvað tilfinningarnar varðar. Ég mæli algjörlega með henni.

Þátturinn sem ég má alls ekki missa af þessa dagana er "So you think you can dance." Þar eru svo flottir dansar og flottir dansarar. Dansarinn sem ég hélt með meiddist um daginn og ég er ekki enn búin að ákveða með hverjum ég held. Kanski þessum sem Mia þolir ekki !!!

Peysa og súpa

Það er nú meira hvað veðrið er búið að vera gott. Samt er nú handavinnan búin að vera í gangi.

Ég kláraði peysu sem ég gaf Katrínu í þriggja ára afmælisgjöf. Peysan var algjör skyndiákvörðun en hafðist fyrir afmælið.

Uppskriftina fékk ég í Ungbarnablaðinu, nýjasta held ég. Peysan er fjólublá framan á forsíðunni en ég ákvað að hafa hana glaðlegri en það.

Svo fann ég þessar fallegu fiðrildatölur í Storkinum. Það er nú meira hvað það er mikið úrval af fallegum tölum þar, ekki það að ég sé að auglýsa fyrir Storkinn. Það var bara úr svo miklu að velja og að því að ég held á skikkanlegu verði.

Það er mjög langt síðan ég hef prjónað kaðlamunstur. Ég var nokkuð fljót að ná tökum að því og náði bara að prjóna munstrið nokkur hratt þegar ég notaði ekki hjálparprjón.

Ég ákvað að láta fylgja með uppskrift að súpu sem ég gerði í sumar og var alveg afbragðsgóð. Uppskriftina fann ég á ms.is og er hún svona:

Rjómasveppasúpa með hráskinku og rifnum villisveppaosti - fyrir 6

100 g smjör

100 g hveiti

5 dl vatn

5 dl nýmjólk

2 stk súputeningar

2 stk sveppateningar

250 g sveppir

1 mtsk smjör

5 dl rjómi

5 sneiðar hráskinka (1 pakki )

Bræðið smjörið og bætið hveitinu í, hrærið vel saman. Setjið saman við mjólk og vatn, sjóðið við vægan hita í nokkrar mínútur. Bætið í súputeningum og sveppateningum. Saxið sveppina og steikið í smjöri, kryddið með salti og pipar. Hellið rjómanum yfir sveppina og látið sjóða upp. Bætið svepparjómanum í súpugrunnin. Skerið hráskinkuna í bita og setjið alveg í lokin út í súpuna ásamt ostinum. Berið fram.

Ég elska

að prjóna úr þessu garni sem heitir Fame trend og er frá Marks & kattens. Litirnir eru alveg ótrúlega flottir og hvernig þeir tvinnast saman.

Ég ákvað að prjóna mér sokka úr hnotu sem ég keypti mér einhvern tíman í vetur. Þar sem ég er svo hrifin af því að byrja á tánni ákvað ég að nota þá tækni.

Þar sem mér finnst líka svo gaman að finna upp hlutina sjálf ákvað ég að hanna mér sokka sem byrja á tánni. Eftir að hafa byrjað að minnsta kosti þrisvar sinnum (of vítt, of breið tá, of þröng tá) var ég með þetta á prjónunum og fótunum.

Mér fannst þetta líta alveg ljómandi vel út og var meira að segja með svo mikla hönnun á sokkunum að ég setti gataprjón sem munstur í þá.

Eftir því sem sokkurinn stækkar er ég ánægðari. Víddin er alveg eins og ég vil hafa hana, litirnir flottir svo ekki get ég kvartað.

Svona líta þeir út núna. Hællinn er ótrúlega auðveldur. Hefðbundi hællinn er auðveldur ef maður kann hann en ef ég væri að byrja að prjóna sokka mundi ég vilja læra þennan hæl því hann er mörgu sinnum auðveldar en sá hefbundni.

Þar sem mér er lífsins ómöglegt að vera bara með eitt stykki í gangi í einu ákvað ég að byrja á litríkri stelpupeysu. Sjáum hvað verður úr henni og hver fær.

Þar sem myndirnar af fína vestinu sem ég hannaði og prjónaði voru svo glataðar ákvað ég að setja inn nýjar myndir af því.

Neðst var breiður klukkuprjónsbekkur. Mér fannst skemmtilegt að breyta frá því að hafa stroff.

Svona lítur það út að aftan og

svona lítur það út að framan. Garnið er silkimjúk blanda af merino ull og silki. Getur varla stungið nokkurn mann. Einnig var það drjúgt því ég notaði bara þrjár hespur í vestið.

Svo er ég alltaf að lesa. Ég ákvað samt að hætta að setja inn allar bækurnar sem ég les en ætla að setja inn bækur sem eru það góðar að ég verð að láta vita að ég hafi lesið þær. Ég er samt bara að ná að lesa tvær bækur í júni en náði að lesa fjórar bækur í maí (reyndar hraðlas ég tvær þeirra).

Í gær hélt ég upp á afmælið mitt og gleymdi náttúrulega að taka myndir. Ég bauð upp á tvenns konar súpur og var önnur Mexico súpa með nacho og öllu tilheyrandi, hin var kölluð Argentínusúpa þar sem Argentína var hitt liðið sem var að keppa í fótbolta þetta kvöld. Hún var reyndar rjómalöguð sveppasúpa með hráskinku út í. Ferlega góð og uppskriftin er á ms.is. Síðan var boðið upp á kökur á eftir. Mér fannst mjög skemmtilegt að fá næstum alla til mín, vantaði hluta af noregsliðinu og karlmennina í Mosarima. Þetta er eitt af því sem mér finnst gefa lífinu gildi, að hitta fólkið sitt og eiga góðar stundir með því.

Fullt búið

af prjónadóti. Nú er orðið svo langt síðan ég setti eitthvað inn að ég er búin að klára nokkur stykki síðan. Fyrst má nefna norska peysu sem ég gerði á HB. Hún valdi munstur og liti sjálf.

Mér finnst peysan ferlega falleg og vel valin hjá henni. Svo var líka mjög gaman að prjóna hana enda var ég ekki nema rúman mánuð með hana.

Ég bjó til nokkrar prjónanælur. Þegar maður er orðin svona mikil prjónakona er ekki lengur hægt að nota garn til að merkja fyrir útaukningum eða öðru. Guðný sem er með mér í handavinnusaumaklúbbi kenndi mér að búa til svona nælur. Það er verst hvað myndin er léleg en myndavélin yfirlýsir svo mikið að litirnir sjást ekki almennilega. Svo var ég að reyna að dekkja myndina í tölvunni og það fór ekkert sérstaklega vel.

Karen er búin að fá húfu við peysuna sína. Kötturinn er sá forvitnasti sem ég veit um og má ekki missa af neinu. Hann stakk sér inn í mynd um leið og ég smellti af.

Þetta er klassískt húfusnið og ég er að hugsa um að setja það inn á vefinn. Það sem mér finnst svo gott við það er að það lokar vel á eyrun. Svo er bara að stilla lykkjufjöldann af þannig að munstrið passi við. Ég notaði sama munstur og er neðst á peysunni sem húfan er við og það kom bara vel út.

Þetta er ekki búið. Eitt stykki klassískt sjal er líka tilbúið. Maður verður að hafa eitthvað að prjóna við sjónvarpið og hvað er betra en sjal?

Ég bara spyr?

Jú, það er líka ferlega fínt að prjóna lopapeysu fyrir framan sjónvarpið. Kanski ekki akkúrat munsturbekkinn en allt þetta einlita er fínt að prjóna fyrir framan TV svo það verði ekki leiðinlegt.

Gunni fékk þessa fínu peysu svo nú er hann kominn í eina sem er ekki trosnuð framan á ermunum, neðan á kanntinum og í hálsmálinu.

En þetta er ekki búið því ég gerði líka vesti sem ég hannaði alveg sjálf, gerði prufu og reiknaði út.
Það var náttúrulega líka gaman. Garnið er ótrúlega flott enda blanda af merinoull og silki. Svo er það sjálfmunstandi svo ég þurfti bara að prjóna án þess að hugsa.

Þá er upptalið það sem ég er búin að vera að gera undanfarið. En ......

það er ekki hægt að vera aðgerðarlaus svo ég byrjaði í gær á sokkum sem ég byrja á tánni. Ég er að prófa að gera þá án þess að nota munstur. Það verður spennandi að sjá hvernig fer...